Gazal In Urdu By Chonch Gayavi

1

غزل

مولوی سے مجھے ہوا معلوم
پاگلوں کی نہیں دعا معلوم

ڈاکٹر نے بھی ایسا فرمایا
اس مرض کی نہیں دوا معلوم

وہ جو برقع میں آتی ہے کالج
نام اس کا مجھے ہوا معلوم

کتنے دل پھینک اس کے پیچھے ہیں
تجھ کو یہ بھی ہے کیا بتا معلوم

نقد مانگا تھا مجھ سے سمدھی نے
دے گا دھوکا مجھے تھا کیا معلوم

کیش لے کر ہوا رفو چکر
اور مجھ کو نہیں پتا معلوم

دل کی حالت عجیب رہتی ہے
آنے والی ہے کیا بلا معلوم

بولے تعویذ دے کے مولانا
تم پہ جادو ہوا ہے نا معلوم

دل ترا چوری ہوگیا ہے چونچ
فال سے یہ مجھے ہوا معلوم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

2

غزل

مصلحت کہتی ہے ماحول یوں اچھارکھو
گھر میں نوکرہے اگر رکھناتو گونگا رکھو

آج کل آدمی غدار بھی ہے چور بھی ہے
آدمی رکھنے سے اچھا ہے کہ کتارکھو

تم کو منظور ہے بیوی کی زباں بندی تو
نقل جو خوب کرے لاکے وہ طوطا رکھو

اب غزل لیتے نہیں ڈائری لے جاتے ہیں
سوچ لو سوچ سمجھ کر کوئی چیلا رکھو

ماب لنچنگ کی مصیبت سے جو بچناہو تمہیں
لے کے آدھار چلو ، بھیا کا چہرہ رکھو

بھیک بھی بھیس بنانے سے ملے گی اے چونچ
ہاتھ کو ٹیڑھا کرو،کپڑے کو گندہ رکھو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

3


غزل
۔۔۔۔۔۔۔

پھول تھے پھر کیسے پتھر ہوگئے
آپ بھی اتنے ستمگر ہو گئے !

موت سے لڑکر یہاں پہنچا ہوں میں
دیکھ کر کیوں آپ ششدر ہو گئے

المدد کہہ کر سنبھالا مورچہ
جب تھکن سے چور لشکر ہوگئے

آس اچھے دن کی تھی سب کو مگر
دن بہ دن حالات بدتر ہو گئے

کارواں کی خیر ہو اب تو خدا!
سارے رہزن آج رہبر ہو گئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

4

غزل

جو بھی تھے ملزم وہ اندر ہو گئے
جرم کرنے والے باہر ہو گئے

میں نے تو یونہی مذاقاً کہہ دیا
"آپ تو آپے سے باہر ہو گئے"

مل گئی ہم کو کباڑی سے بیاض
اور ہم استاد شاعر ہو گئے

گرچہ اس زمرے میں شاعر ہیں کئی
مفت میں بدنام نشتر ہو گئے

آگئی کیسی بلا این آر سی
لوگ کتنے گھر سے بے گھر ہو گئے

میں نے سمجھا تھا کہ سدھریں گے مگر
آپ تو کچھ اور خود سر ہو گئے

ان کے ابا نے ہمیں ٹیوٹر رکھا
اور ہم قسمت سے شوہر ہو گئے

مال سب رشوت کا کھا کر دیکھئے
جتنے لاغر تھے تونگر ہو گئے

غور کرنے کا ہے موقع چونچ جی
کیوں بھلا ہم اتنے لاغر ہو گئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

5

غزل

تو جیسا بولے گا ویسا کروں گا
ترے نقش قدم پر ہی چلوں گا

نوازے گا خدا مجھ کو بھی اک دن
ترقی سے تری کیوں کر جلوں گا

مرا حصہ اگر رکھتاہے رکھ لے
میں بھائی سے بھلا کیونکر لڑوں گا

بلا سے دار ہو میرا مقدر
میں سچی بات ہی اکثر کہوں گا

اگر تقدیر میں لکھی ہنسی ہے
تو میں دن رات یوں ہنستا رہوں گا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
6

غزل

مولوی سے مجھے ہوا معلوم
پاگلوں کی نہیں دعا معلوم

ڈاکٹر نے بھی ایسا فرمایا
اس مرض کی نہیں دوا معلوم

وہ جو برقع میں آتی ہے کالج
نام اس کا مجھے ہوا معلوم

کتنے دل پھینک اس کے پیچھے ہیں
تجھ کو یہ بھی ہے کیا بتا معلوم

نقد مانگا تھا مجھ سے سمدھی نے
دے گا دھوکا مجھے تھا کیا معلوم

کیش لے کر ہوا رفو چکر
اور مجھ کو نہیں پتا معلوم

دل کی حالت عجیب رہتی ہے
آنے والی ہے کیا بلا معلوم

بولے تعویذ دے کے مولانا
تم پہ جادو ہوا ہے نا معلوم

دل ترا چوری ہوگیا ہے چونچ
فال سے یہ مجھے ہوا معلوم
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
7
غزل
۔۔۔۔۔۔۔
کون کہتا ہے تمہیں خوف زمانہ رکھو
خوف رکھنا ہے ضروری تو خدا کا رکھو

حق کی آواز دبانے سے کہاں دبتی ہے
سر حسینی ہے اگر تو اسے اونچا رکھو

آئینہ دیکھنا پڑجائے تو حیران نہ ہو
اپنے کردار کو اسلاف کے جیسا رکھو

کچھ نہیں پاؤگے باتوں کا سپاہی بن کر
زندگی جینے کا تم خود میں سلیقہ رکھو

ہر کوئی اپنی مثالوں میں تمہیں یاد کرے
اپنا کردار زمانے میں یوں اعلیٰ رکھو

اور بھی لوگ ہیں محفل میں چلو،آؤ ملو!
اس قدر بھیڑ ہے خود کو نہ اکیلا رکھو

چار دن کے لئے آئے ہو چلے جاؤ گے
"اپنے دل میں نہ کبھی خواہش دنیا رکھو"

نسل در نسل زباں رہتی ہے قائم اس سے
اپنے گھر میں کوئی اردو کا رسالہ رکھو

انتظار اور ابھی پانچ برس تک کرلو
اچھے دن آئیں گے رہبر پہ بھروسہ رکھو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چونچ گیاوی۔۔۔۔۔۔۔۔پٹنہ(بہار)
9334754862